MYSIA

MYSIA

regio minoris Asiae ad hellespontum, Troadi contermina: cuius incolae Mysi, abiectissimae conditionis homines, sortisque adeo contemptae, ut cesserint in proverbium. Quoties enim hominem nullius pretii volebant denotare, Mysorum ultimum esse dicebant. Cicer. pro L. Flacco. Et quia erant iniuriarum patientes, hinc Mysorum praeda, Proverb. Item Mysorum et Phrygum termini discreti, Proverb. de rebus totô caelô diversis. Strabo etiam Mysos constituit in Europâ, in confinio Pannoniae ad Danubium fluv. putatque Mysos Asiae populos ab his, ut originem, ita et nomen duxisse. Sed hi a Plinio Moesi dicuntur. Vide Bochart. Phaleg. l. 1. c. 12. Dividitur autem Mysia in maiorem, et minorem: Maior Hellespontica appellatur a Galeno, et populi Hellespontii a Strabone, in qua Cyzicus et Lampsacus urbes praecipuae. Minor a Strabone Olympica a monte Olympo dicitur, in qua Prusa urbs Bithyniae. Baudrando fuit haec regio, maxime ad Occasum extensa. Eaque vel Minor, versus Hellespontum, et inter Propontidem ad Boream, et Troadem ad Austrum, ubi Cyzicus et Lampsacus, in ora Propontidis; vel Maior, quae Orientalior erat; inter Mysiam minorem ad Occasum, Bithyniam ad Boream, Phrygiam magnam ad Ortum, et mare Aegaeum ad Meridiem, ex Phil. a Via. Nunc utraque sub Natolia propria comprehenditur, et sub Turcis est, a tribus fere saeculis. Mysia etiam, regio Europae gemina est apud Ptol. superior et inferior. Vide Moesia, sic enim melius scribitur. Addo, quod in hac regione herbam reperiri, quâ oleum, quod vocent Medicum, inficiatur, tradit Solin. c. 23. Cuiusnaturam sic exprimit Dion. Afer de situ Orbis,

Et Masi Thracum boreis in finibus orti,

In quorum terris, quas ponti perfluit unda,

Ignipotens oleô commistô gignitur herba,

Medica cui nomen; cuius compescere flammas

Si quis aquâ cupiat, plus ignem pascit in illa;

Pulveris hunc iactus potis est exstinguere solus.

URBES MYSIAE SEU MOESIAE EUROPAEAE:

*Achillae, Kylia.

*Alba.

*Arribantium, Wiczitern.

Barna. Vide Varna.

*Bidina, Vidin.

Calatis, Kilia.

Dinogetia, Drimago.

*Dionysiopolis. Vide Varna.

Durostorum, Durostoro.

Galatium, Galacz.

*Mesembria, Mesember.

Nessum, Nissa.

*Nicopolis, Nicopoli.

Odessus, Lemano.

Rhaetiaria, postea Nicopolis, Nicopoli.

*Scupi, Uschup.

*Silistria, sic vulgo, Episcopalis superioris, et sedes Praefecti, Silistrie.

*Singidunum, Senderim.

*Sophia, sic vulgo, metropolis et caput Bulgariae, Sophie.

Sucidava.

Ternobum, Ternovo.

Tirista, Drista.

Tomi, Tomismar.

Varna, Varne.